Vriedaag 17.8.2018 ginge we met de trein naor Arnhem. Idderein stond optièd klaor op ut station. Der waare gén probleeme met treinkaertjes umdat idderein un gratis meireiskaertje had meijgenaome. Dien kóste dan meij met Frans zien OV krt. Dae meus dan wal betaale. In Arnhem stapde we ut station óet en stooke de waeg euver naor ut Best Western hotel. Prima geregeld. Ut ierste óetstepke waas naor ut Taphuys. Daor kós se kieze óet wal 50 soorte baer. Aan ein merk hadde weej genóg. Umdat we honger kreege ginge we de hook um en vonde restaurant St.Jan.
Door kós se neet allein lekker aete maar auk blieve zitte tot ut duuster woort.
Op de zaoterdaag kuierde we naor de Rijnkade en zooge dat ut der baeter verzörgd waas dan in Venlo. Die hadde zelfs unne alde heiskraan laote staon dae auk op de kop van Wierd in Venlo haet gestaon. Ut Airborne at the bridge Museum waas aope. Met ut zicht op de Rijnbrug woort door in ut kort informatie gegaeve euver de slag beej Arnhem. Toen wie die kinnis hadde opgesnaove leepe we waer truuk naor ut Centrum. We kwaame door nog un joekel van un aerdverke taege dae door de dierentuin kado waas gedaaon aan de minse van Arnhem. s'Middaags waas der un bezeuk aan de kelders van Arnhem gereegeld. De schoënzoon van Martin zoel nog wat extra informatie verstrekke. De ingehuurde reisleider vertelde iers baove de grond vuuls te vuuël euver ut ontstaon van Arnhem en welke winkels der looge. Toen ginge we onder de grond. Ze hadde door de kelders óetgegraave, opgeknap en met elkaar verbonden. En dan wis dae waer vuuls te vuuël te vertelle. Toen we klaor waare stond de schoeënzoon van Martin met de mond vol tande umdat alles al dreej kier verteld waas. Hebbe we dae maar meijgenaome naor ut terras van St. Jan en wat te drinke gegaeve. Toen we honger kreege hebbe we door waer lekker gegaete en zien blieve zitte tot ut donker woort. En kóste we prooste op VVV die verloore hadde taege Ajax maar iets baeter dan dat die Ingelse heej in Arnhem verloore hadde.
Zondaags ginge we naor ut Airborn museum in Oosterbeek. We pakde de bus op ut station. Die met det meijreiskaertje woele de buschauffeur geld gaeve. Maar det kós al 10 jaor neet mier. Dus vertrok de bus 15 min laater veur ze det snapde en ze un aafbetaling gereegeld hadde.
In Oosterbeek stond unne kleine villa Hartenstein met ein kenon veur de deur. Gén museum te zeen. Bleek dat se det door onder de grond van ut park hadde verstop. Dreej verdeepingen deep. Mót zegge dat ut de meuite weerd waas. Idderein wet noow dat se met allein unne Jeep en aanhangwagen en door achter un klein kenon, die pasde in un zweefvliegtuig, néét kós winne van die Pruuse met allemaol van die groeëte tanks.
Dae nieje reisleider Martin had det allemaol prachtig gereegeld. We meuste wal iets mier zelf betaale en ik geluif wal zeeve kier lappe.