Vertrek om 14.04 oor en zoë rond kwart veur twië kwame we op ut stationsplein beejein, want d'r meuste nog OV kaertjes gekôch waere. Det is nog altied ein gedoedel. D'n eine haet ein NS abonnement, d'n ander ein OV chipkaart en weer ein ander haet ein onpersoënlikke OV-kaart. En dae ander hat gaar niks. Maar good, weej kwame d'r wal oet.
Van Venlo naor Remung met Violia en met de NS van Remung naor Ech. Daor stond ein taxibuske klaor en dae brach os naor Maaseik. We logeerde in ein luxe 4 sterre Hotel met de naam Van Eyck. In Maaseik wal zoe bekind van die Gebreurs Van Eyck det is geliek aan waat Flujas en Guntruud veur Venlo zien.
Alzoe: De kamers woorte ingedeild en de koffers woorte oetgepak. Ut waer waas neet al te bes. Inkele Wannevleegers hadde noch de zomerse temperatuur in de kop want die hadde de korte boks (zonder liefke) meigenaome en aangedaon !
We hadde gen baeter weekend kinne neme want d'r waas ein groet HerteBufkes fiës op de Merret.
3 daag lank. Det waas zoals Mestreech zien Preuvenemint haet. De merret stond vol met Pagodetenten, Meziekpodium en Beertente.
Naodet weej de vluchroute in ut hotel bekeke en good bevonde hadde, koste we dus met ein good geveul os ierste pilske op ut boeteterras gaon nuttige!!
De wolke in de luch begoste ein donkere kleur te kriege en de wind ging harder waeje en de dieke raegendrûppels kwame al hiel gauw en ut begos te storme ,te storme en te storme... maar de wannevleegers bleve op ut terras zitte.!
Cees ging ondertösse beej de lokale VVV informatie haole ( waas naeve ut Hotel) ,zoedet weej beej good weer, mier cultuur en ontspanning kôste snoeve, want Maaseik haet mier dan allein terrasse en kroege!!. De lôch klaorde op , raegen en wind ware opgetrokke en beslaote woort om ens ein rundje te gaon make. Vanaaf 20.00 oor waas ut HerteBufkes veur idderein aope. en.... ut zoel auk neet........we stonde aan de Beerbar te geneete van ein (en/of miër) Stella Artois pintjes van 0.25cl veur 2 € èn de artieste op ut mziekpodium. Noadet we genôg hadde van R&B meziek ginge we vaerder op zeuk naor ein ech kefee ! Want rondum de merret ware allein nog restaurants . Daor zoge we opèns op ein hook van de straot minse boete op ut terras zitte, dus d'r moos wal ein kefee zien. Waat ein mazzel, det waas now ein ech kefee à la de Gaaspiep. Woorte bestiert door broor en zus. Op det moment allein de broor van de zus. Gezellige luuj, gooije bedeening en Stella Artois, pint van 0,25cl veur …...€ 1,60 ! De gaste die woele rauke kôste det boete doon
onder ein daeke van 2 infraroeije lampe. (det kôsse auk waal aan eur zeen wie ze truuk kwame!)Nao inkele gezellige eurkes sloefde weej voldaon naor ut hotel en krope onder de wol.
Zaoterdaag 15/8:
Boete waas ut gries en kalt. Ontbijt waas tösse 07.00 en 10.00 oor. Dezen daag woele we toch wat mier zeen en ontdekken van Maaseik. Wie gezag, Cees had beej de VVV ein stadswandeling gehaold en dae ginge weej now laupe. We kwame bekinde straotname taege zoeals: Kleine Kerkstraat, Grote Kerkstraat. Weej waande ôs efkes truuk in Venlo. De groete kerk zien we ingewaes, efkes in de beechstool gezaete en foto's gemak. Al laupende door de straote kôs Cees moei vertelle euver alle belangrieke en onbelangrieke gebouwe met eur historie. Waat os wal opveel det dae zaoterdaag praktisch alle winkels , shoppingcenter, musea geslaote ware.Weej vonde det maar vraemp. Beej naovraog aan inkele passanten waas ut duudelijk. Zaoterdaag 15 augustus is in Belgie ein kerkelijke fiësdaag: Maria ten Hemelopneming.
We leepe euver stadsmoore, door steegjes en 't veel os op det we 4 kier oetkwame op de Merret. . ,Als det neet verdach is!. Tied veur ein versnapering en waor zoel det zien...? tuurlijk in de “Belgische” Gaaspiep. We zoele daornao auk nog ein wandeling van 6 of 14 kilomaeter maken, det is maar doorgeschaove naor de zondaag.
Weer truuk naor ut terras van ut hotel en de raegen deende zich aan. En ut raegende zoë hard det weej naor binne meuste. Die Wannevleegers mit eur korte boks (zonder liefke) meuste now eur principes opzie zette en gingen de lang bôks aantrekken. De terrassen rondum ut evenement ware laeg. Wat jaomer toch veur de organisatie en deilnemers aan det HarteBufkes gebeure ! Aangezeen weej vriedaagaovend genne tied en zin hadde veur ein grande diner hebbe we maar ozze toevluch genaome naor de frietkot ( dae kot had vuul weg van de friture De Prins oet de Prinsenstraot !!). Dus, Cees ging zeuke wao weej dan wal kôste “dineren”. Brasserie De Beurs , auk op de Merret, had nog plaats veur os en efkes later zoote weej aan taofel. Naodet Dame Blanche en Capuccino genuttigd waas, woort ut weer tied naor boete te gaon en de aovend vaerder door te bringe , jaowaal............. in de “Belgische” Gaaspiep!
Zondaag 16/8:
We trokke de gordiene aope en jaowal huur.. ut zoog weer gries... maar wal drueg. Nao ut ontbijt effe vergadere op ut terras, want dae wandeling meus nog gedaon waere. De wandelkaart woort oet de tes gehaold en omdet we dees letsten daag neet laat thoes woele komme woort beslaote veur ein wandeling naor Aldeneik en truuk. Dae wandeling deej os good nao al det gebuis! Ut waas ein moeie wandeling dae os moeie en lilikke bouwsels van huuzer leet zeen. Weej hadde de haop om in Aldeneik örges nog ein versnapering te kinne nuttige, maar helaas alles waas dich en als ze al aope ware waas det veur ein beslaote gezelschap. We zoge in Aldeneik ein toeristentreintje aankômme en omdet det treintje vol waas en de lôch weer donkerder woort, meuste weej os spaoije om weer op tied in Maaseik truuk te zien.
Einmaol op ut hotel-terras aangekomme smakde dae Stella Artois weer good en we hadde euverleg wie laat det taxibuske meus komme om os naor NS in Ech te bringe. Det deurde nog efkes en de euverwaeging waas , als d'r nog tied is, om met det toeristentreintje ein toer van 50 minuten te maken. Dan zoele weej Maaseik van alle kanten nog kinne zeen en interessante verhaole aanhuuren.
Det is d'r helaas neet van gekomme want de chauffeur van det taxibuske zoel os komme ophaole om 14.15 beej ein bloomeboetiek in ein straot beej ut hotel. Weej koste dan in Ech de trein neme van 14.44 oor.
De koffers woorte gepak beej de receptie , de receptioniste bedank veur de gooij zorg en service en op.....naor de bloomeboetiek.
Ut had neet vuul gescheeld of dae trein van 14.44 oor hadden we môtte missen. Naeve de chauffeur zote Cees en Joep. De chauffeur huurde de verhaole van os weekend met zoevuul belangstelling en interesse aan det hae de juuste aafslag naor de trein miste. Dreide de bus op de waeg en weej ware nog tiedig beej de statie.
Op de haerwaeg koste we inkele reis kaartjes kaupe, dus now weer inkele reis kaartjes. Jaowal huur, ….......det gedoedel met al of gen NS OV kaart met of zonder abonnement begôs weer!!!!!!!! Ut scheelde neet vuul of dae trein van 14.44 oor hadden we motte missen.
Good en wal in Venlo aangekômme hebben we Cees bedankt veur zien oetstaekende organisatietalent !