Op vriedaag 22.8.2014 vetrokke we met de trein naor Mestreech. Cees waas ózze reisleider. Nao vuuël praote en straevele had idderein un los daagkaertje, un anomieme OV kaart waorop se geld meus storte of un OV abonnement dae ut geld automatich van de raekening aaf deej boeke. De reis ging flot wies Sittard. Daor meuste we in un bus euverstappe. Kwaame we terecht in un file op de A2. Opens reej dae op twieëe laege (bus)banen idderein veurbeej. Ut schient dat det met rechs aaslaond verkier moch. In ut hotel de la Bourse hebbe we der direk un paar gedronke aan de bar. Ut waas gen probleem dat door idderein (zelfs de bedeening met aete) euver de bein struukkelde umdat der zoeë weinig plaats waas. Den ierste aovend kwaame we terech in kefee in de Karkol. Door waas un ontiègelikke herrie. De huurapperate kóste neet beejgesteld waere. We zien toen naor ut kleinste kefeeke de Moriaan gegaon. Heej kóste we elkaar waer verstaon. Truuk beej ut hotel ging ut beej de Ierse Pub vaerder.
Op zaoterdaag 23.8.2014 had Cees un geweldig cultureel programma. We ginge naor de Kazematten. Det zien ondergróndse kilomaeterslange gange um tièdens un belegering de vijand te kinne benadere. Wie verzin se det. Der waare luustergange waorin der eine zoot dae meus oplette of de vijand neet auk aan ut graave waas. Waas det zoeë dan groove ze der unne gank naor toe en bleeze die dan op. Aan de bóetekant waare druuëge grachte waor se de vijand vanóet un reemke kós bescheete. Frans en Jan ging neet meij onder de grond umdat se ut te ing vónde. Waer baove de grond hebbe we beej kefee de Tramhalte lekker bóete wat gedrónke tot ut flink begós te raegene en we binne vaerder kóste gaon. Op de truukwaeg hebbe we der veur gekaoze um auk nog unne boeëttoch te maakte naor de St. Pieter. Inkele muuëge ginge waer met de boeët truuk. De andere zoele truuk laupe. Beej Slavante baove op de St. Pieter kreege we hónger en oote iers nog unne tóstie. Dan ging de lange wandeling truuk naor de stad. Begós ut alwaer te raegene. Jac had inmiddels un lek in de leiding en meus beej iddere baum pisse. Dae waas dubbel naat. In ut hotel hotel zoote de andere al te wachte. Daor hadde we ut diner aafgespraoke. Die met un veurgerech hebbe de zaak lang opgehalde. Maar dan kwaam toch ut langverwachte aete wat óetintelik auk nog neet zoeë geweldig waas. Toen ging ut al richting elf oor en meus der nog gestap waere. Volgens mich waare de stappers erg onröstig. Volges huuëre zegge zien ze nog wal in ach kefees gewaes. Sommige sloote de deure toen ze kwaame. Andere waare te luidruchtig met muziek óet de Jordaan en eine gek had de kerstbaum nog staon van aafgalupe jaor. De Karkol en de Moriaan woort auk nog bezóg.
Zaoterdaag 24.8.2014 ging um 6.45 ut brandalarm aaf in ut hotel. Joep en ik trokke de kleier aan en stónde binne un paar minute met ut koffer bóete met nog un paar hotelgaste. Genne Wannevleeger te zeen. De brandwaer kwaam der snel aan en de manne rende naor binne. Die kwaame naor 10 minute waer naor bóete en reeje weg. Neemes van ut personeel van ut hotel waas te zeen of kwaam wat vertelle euver ut rampenplan. Zien we maar zelf naor binne gelaupe waor de nachtportier ut sleutele waas aan un kesje van ut brandalarm. Hae kreeg ut alarm neet óetgezatte. De slummerikke van de Wannevleegers trokke eur eigen plan tièdens ut alarm. Ton stond op ut balkon un tret te rauke. Jac stond op ut balkon "brand....brand" te roope tot Jan um naor binne trok. Jan en Huub hebbe geprobeerd ut alarm op eur kamer óet te zette door de batterie der óet te trekke wat neet ging. Cees had un stappeplan. (S)toppe met activiteite waar je mee bezig bent. (R)ustig blijven. (B)ereedeneer wat der aan de hand is. (O)nderneem actie. Hij draaide zich om in bed en sliep verder. Huub en Frans zien opgebleeve en hebbe lange wandelinge gemak tot idderein um 11.30 oor ut ontbijt op had. Umdat der gen plan mier waas veur deeze daag en der verschillende vruuëg tóes woele zien, zien we opgestap en naor ut station truuk gelaupe en hebbe beej Keefe de Posthoorn de letste cente opgedrónke. We stapde in de bus naor Sittard en reeje weg zónder Cees. Hae meus nog wat reegele. In Sittard zooge we um truuk op ut station. Had dae zelf un eige bus !.
Ut weekend waas veurbeej. Gezellig, cultureel en met un bietje raegen.